Һазир наһийәмиздики дехан вә чарвичиларниң арисида қишлиқ мәвсүмгә тәйярлиқ қизиған пәйт. Бийилқи ашлиқни жиғиштуруш билән биллә қишқа йәм-хәшәк тәйярлаш ишиму қолға елинған.
Наһийәлик йеза егилиги бөлүминиң мәлуматиға қариғанда, мал озуғини тәйярлаш ишлири мәхсәткә мувапиқ әмәлгә ашурулмақта. Наһийә бойичә планланған (бийилқи жилға) 170 миңға йеқин тонна чөп тәйярлаш керәк болса, бүгүнки күнгичә йүз миң тоннадин ошуқ пичән тәйярланған, йәни 60 пайиздин ошуқ йәм-чөп тәйяр дегән сөз. Һазир бир тюк (бағ) бединиң баһаси жилдики баһаларға нисбәтән әрзәнирәк болуп, 700-900 тәңгә әтрапида болмақта. Чөпниң баһаси 400-600 тәңгини тәшкил қилиду. Бу көрсәткүчләр алдинқи жилдики баһалардин хелила әрзән дегән сөз. Мундақ болушиниң сәвәви, бийил йеғин-йешин көп болуп, пичәнликләрдә чөпниң һосулдарлиғи яхши болди. Шуңа барлиқ йеза аһалиси вақитни ғенимәт билип, чөп топлаш мәвсүмини муваппәқийәтлик аяқлаштуруш ишиға жиддий киришкән. Йәнә бир ейтарлиқ нәрсә, йетилдүрүлгән чөп мәһсулатини хошна наһийәләргә сетиш әмәлгә ашурулуп келиду.
Чөп чепиш вә уни исрапсиз жиғиш ишлири һәр бир чепинзарлиқта жиддий әмәгә ашурулмақта. Мални чөп билән тәминләш режиси наһийәмиздә, сөзсиз, орунлинип, мални қиштин аман-есән елип чиқишниң чарилири мошу баштин назарәткә елинған. Шуңлашқа наһийәмиздики барлиқ округ вә тәвәләрдә чөпни жиғиштурушқа жут әһли киришип, барлиқ мүмкинчиликләрни яритип, күнниң мошундақ пәйтлиридә сапалиқ жиғивелишниң тәрәддутини намайиш қилип, чепинлиқ мәйданиға сәһәр берип, кәч қайтип әмгәк һосулдарлиғини көрсәтмәктә.
Һәр қандақ иш техника күчи билән пүтидиған дәвирғу. Мана шу чөпни жиғиштуридиған машиниларни тәйярлаш, һажәтлик қисимлар билән тәминләшни баһарниң келиши биләнла башчилиққа алған екән. Һазир чөп чепиш, уни сүпәтлик жиғиш ишлириниң мәхсәтчанлиқ билән орунлиниватқанлиғини, йәни планланған чөпниң толуқ орунлинидиғанлиғини наһийәлик йеза егилиги хадимлири зор ишәнч билән тәкитлимәктә.
«Қишта керәк чанаңни, язда тәйярла» тәмсилигә риайә қилған наһийә хәлқи вақит билән һесаплашмай, әмгәк етип, қишлиқ мәвсүмни хатиржәм өткүзүшниң барлиқ шараитлирини яритип, тирмишип-тартишип әмгәк қилмақта. Шуни алаһидә тәкитләш керәкки, наһийәмиздики барлиқ аһалилиқ пунктлардики хәлиқму өзлириниң өлчүк йәрлиридики пәрвиш қиливатқан пичәнликлириниң үнүмдарлиғини ашуруш үчүн һажәтлик озуқлар билән озуқландуруп, сапалиқ һосул йетиштүрүшниң йоллирини қилған. Нәтижидә мол һосул мәһсулат йетиштүрүп, жиғиватмақта.
Жәмләп кәлгәндә, малниң қишқа һажәт озуғини тәйярлашта наһийәдә барлиқ шараитлар яритилип, иш мәвсүмини муваппәқийәтлик өткүзүшкә толуқ мүмкинчилик бар дегән сөз.
Худавәди МӘҢСҮРОВ
