Президент Қасым-Жомарт Тоқаев «Ana tili» гезитиға бәргән сөһбитидә «Мәхситим – ихтисатни вә мустәқилликни мустәһкәмләш» дегән пикрини ениқ ейтти. Умумән, пикир алмаштуруш жәриянида хәлиқни тәшвишләндүргән муһим мәсилиниң һәммиси ой әглигидин өткүзүлди десәм, мубалиғә әмәс. Дөләт рәһбири вақит бәлбеғи, Талғир вақиәси вә қанунниң һәм жазаниң күчийишигә мунасивәтликму пикир билдүрди.
Сөһбәттә сөз болған мавзу буниң биләнла чәкләнмәйду. Президент Ақорда әтрапида болуватқан гәп-сөзләргиму жавап берип, рәсмий минбәрләрдә ейтиливәрмәйдиған сәясий сирлар биләнму бөлүшти. Униң ичидә һакимийәтниң алмишиши вә Тунжа Президентниң Москваға сәпири тоғрилиқму әтраплиқ ейтилди.
Сөһбәттә Президентниң Нурсултан Әбиш оғли билән мунасивитиму соралди. Тәкитләш керәкки, Дөләт рәһбири униң әлгә сиңәргән тарихий әмгигини адил баһалаш һажәтлигини илгириму бир нәччә қетим ейтқан еди. Һәр қандақ дәвирниң яхши һәм көләңгү тәрәплириниң бар екәнлигини ядимизға селип: «Йеңи тарихимизда ярқин пәйтләр интайин көп», деди Қасым-Жомарт Тоқаев. Президентниң пикричә, өткәнни унтушқа болмайду, әл шежирәсини бешидин башлап қайтидин башлап йезиш бәк ховуплақ. Президент дөләткә зийини тегидиған қарар қобул қилишқа һеч кимниң һоқуқи йоқ екәнлигиниму очуқ ейтти. Шуңлашқа қәрәлдин бурун өтүши мүмкин Парламент сайлими тоғрилиқ пикир билдүрди. «Мундақ тәхминләр бар екәнлигини билимән. Бу әхбарат әттәй тарқитиливатиду дәп ойлаймән. Мениңчә, Парламент сайлимини қәрәлидин илгири өткүзүшкә һазирчә һеч қандақ асас йоқ», деди Дөләт рәһбири. Қасым-Жомарт Кемел оғли сөзгә чечән болғини билән, қолидин иш кәлмәйдиған мутәхәссисләрни бошитиш тоғрилиқму ейтти.
Сөһбәттә қазақ тили тоғрилиқму сөз қозғалди. Президент қазақчә сөзләш модиға айланғанлиғини ейтип, еһтияж өсүватқанлиғиға тохталди. «Ана тилимизниң келәчиги парлақ екәнлигигә мениң һеч гуманим йоқ. Қазақ тили дөләт тили сүпитидә хәлқимизни жипсилаштуруш йолида муһим роль атқуривериду. Бирақ тилимизни мустәһкәмләймиз дәп, уни башқа тилларға, униң ичидә рус тилиға қарши қоймаслиқ керәк», деди Президент.
Сөһбәт ахирида Қасым-Жомарт Тоқаев мәтбуатқа йеқинлиғи тоғрилиқ ейтти. Қәрәллик нәширләрниң дөләт сәяситидин хәвәр беридиған муһим әхбарат мәнбәси болуп қаливеридиғанлиғиға тохталди. «Гезит-журнал оқуш – яш вақтимдин шәкилләнгән әнъәнә. «Ana tili» гезитиниму турақлиқ оқуп туримән. Мән мәлуматни телевидениедин, Интернет, ижтимаий тор охшаш һәр хил әхбарат мәнбәлиридин алимән. Униңдин башқа һәр күни һәр хил орунлардин материаллар келип чүшиду. Язмичә мәтинләрниң мәзмун-маһийитини төвәнлитишкә болмайду».
Сөһбәттә Қасым-Жомарт Тоқаев көпниң көңлидә жүргән муһим соалларға ениқ жавап бәрди. Сөзиниң ахирида Президент: «Ушбу сөһбәтни көпчиликкә чоңқур ой селиш вә вәтәндашлиримға йоллиған мәхсус муражиитим дейишкә болиду», деди. Һәқиқәтәнму, бу сөзниң тегидә чоңқур мәна бар…
Әхмәтжан ҺАШИРИ,
Қазақстанниң хизмәт көрсәткән әрбаби,
Қазақстан хәлиқ язғучиси
