ХХІ әсир – аләмшумул өзгиришләрниң дәври. Заман тәрәққиятиға маслишип өмүр сүрүш үчүн бизму дайим өзгириштә болимиз. Мәсилән, йеңи кийим сетиваларда һәммимиз «модиға» лайиқ кийинишкә тиришимиз. Дәл шуниңға охшаш, билим елишта, хизмәт қилиштиму дәвир еқимиға лайиқ тәр төкүшимиз тәләп қилиниду. Чүнки пәқәт әң билимлик вә ишләмчан инсанларла утуққа йетиду. Башқилар бизни қандақ кийингинимиз, қандақ өйдә яшайдиғанлиғимиз яки қандақ машина һайдайдиғанлиғимизға қарап әмәс, әқил-ойимиз, сәвийәмиз вә пәм-параситимизгә қарап һөрмәт қилиду.
Өзгириш демәкчи, һәрқандақ тирикчилик егиси өзи яшайдиған муһитқа маслишип кетиду. Белиқлар суда яшиғачқа, үзиду, қушларниң қанити болғачқа, асманда учиду. Адәмләрчу? Адәмләрму дәл шундақ. Һәрбир дөләтниң орунлашқан җайи, климити, қанун-қаидилири һәрхил болғачқа, гражданлириму һәрхил. Һәрким өзи яшиған дөләтниң қануни чәмбиридә өмүр сүриду вә тәрәққий етиду. Шундики демәкчи болғиним, йеңи Конституциямизниң қануний күчигә киришини биздики йеңи өзгиришләрниң башлини дәп чүшәнсәк хаталашмаймиз.
Президентимиз ейтқандәк, Асасий Қанун билән биллә дөләт һакимийәт системисиму түп-асасидин йеңи шәкилгә егә болди. Дөләт һакимийитиниң йеңи қурулумини шәкилләндүрүш, Қазақстан ихтисадини йеңи үлгигә көчириш, елимизниң энергетика вә инфрақурулум асасини мустәһкәмләш,рәқәмлик дөләт қуруш вә адәм капиталини тәрәққий әткүзүш мәхситидә тәйярланған йеңи Конституциямиздики өзгиришләр мәмликитимизниң риқабәткә қабиллиғини ашуридиғанлиғиға ишәнчим камил. Чүнки қанунниң һәрбир тармиғида хәлиқ мәнпәити көздә тутулған.
Болупму кейинки жилларда елимиздә аяллар билән балиларниң һоқуқини қоғдашқа алаһидә көңүл бөлүниватқанлиғи һәммидин бәк хуш қилиду. Гендерлиқ тәңлик мәсилисиму һечқачан күн тәртивидин чүшкән әмәс. Шуниң нәтиҗисидә қазақстанлиқ аяллар әрләр билән бир сәптә әмгәк қилип, дөлитимизниң тәрәққиятиға өз төһписини қошуп келиватиду. Җиниси, миллити, хизмити қандақ болуши қәтъий нәзәр, һәммә адәм қанун алдида тәң.
Баравәрлик орниған Адаләтлик Қазақстанниң гражданлири адил, вәтәнпәрвәр, әмгәксөйгүч, қабилийәтлик, тиришчан вә тәдбирчан болуши керәк дәп ойлаймән. Чүнки заманниң бүгүнки тәливи шу. Һә, Асасий Қанунимиздики ахирқи өзгиришләр бизни дәл шу принципларға лайиқ өмүр сүрүшкә тәрбийиләйду.
Айтүнәм МӘМИРОВА,
Уйғур наһийәлик Ишбиләрмән аяллар кеңишиниң рәиси
