Биз Руқийәм Низамова билән буниңдин 8-9 жил илгири тонушқан. Әмгәк йолумни йеңидин башлап, Уйғур наһийәсидики наһийәлик гезитқа ишқа киргән пәйтим. Руқийәм Мимәнҗанқизи болса, Ақтам йеза округи һакими аппаратида яшлар иши бойичә методист-инструктор болуп ишләтти.
Шу чағдила у наһийәниң үлгә тутар яшлириниң қатарида болуп, сәһниләрдин, гезит бәтлиридин чүшмәтти. Қисқиси, биз хизмәт бабида тонушуп, тез тил тепишип кәттуқ. Вақит билән тәң жилларму йөткилип турғинидәк, һаят бизниму у йәрдин бу йәргә йөткиди. Бу күнләрдә у Алмута шәһиридә, тамамән башқа саһада хизмәт қиливатиду. Ениғирақ ейтқанда, тиҗарәт йолини таллап, өзиниң тикин цехини ишқа қошти.
Башта қәйт қилғинимдәк, кәлгүси тиҗарәтчи дәсләпки паалийитини Ақтам йеза округи һакими аппаратида яшлар иши бойичә методист-инструктор болуп ишләштин башлиған. Әсли дипломи бойичә оқуған мутәхәссислиги – ихтисатчи болсиму, у бу хизмәтниң һөддисидин толуқ чиқалиди. Ана жутида, йеза яшлири билән қизғин паалийәт елип барди. Шундақла, дәсләпкиләрдин болуп мәлисидә онлайн буйрутма арқилиқ сода-сетиқ қилишни қолға алди. Шәһәргә көчүп кәлгәндин кейин күч-җигәрини пүтүнләй тиҗарәткә беғишлап, онлайн дукини билән қатар «Рәйхан» пәрдиләр салонини ачти.
Буниңдин бир жил илгириғу дәймән, Руқийәм Мимәнҗанқизи билән ахирқи сөзләшкинимиздә, алдики вақитта у пәрдә тикидиған тикин цехини ечишни ойлаштуриватқанлиғини ейтқан. Ойға алған ишини әмәлгә ашурмиғиничә тиним тапмайдиған тонушум ахири өз дегинигә йетипту. Өткән жили арминидики тикинчилик цехини ишқа қошуп, он адәмни турақлиқ иш билән тәминләпту. Йеқинда йолум чүшүп, «RICH HOME» дәп атилидиған тикин цехиниң иш-паалийитини өз көзүм билән көрүп қайттим. Барлиғи шундақ әтраплиқ ойлаштурулған. Рәңму-рәң рәхтләргә толған тикин цехида қизғин иш меңиватиду. Әҗайип көрүнүш!
– Балимиз туғуларда яхши исим қоюш мәхситидә узақ ойлинимизғу. Шуниңға охшаш көптин күткән цехимни ишқа қошарда мәнму уни қандақ атисам болар дәп узақ ойландим. Чоңлардин «Ишиңниң бәрикитини бәрсун!» дегән дуга-тиләкни көп аңлиғачқиму, мениңму бу башланмам бәрикәтлик болсун, биз тиккән пәрдиләр херидарлиримизниң өйини гөзәлләштүрүпла қоймай, бәрикәт елип кирсун дегән нийәттә цехимни «RICH HOME» дәп атидим. Йәни бу уйғурчиға тәрҗимилигәндә «бәрикәтлик өй» дегән мәнани билдүрииду, – дәп гәпни цех наминиң берәр мәзмунини чүшәндүрүштин башлиди яш мудир.
Һәқиқәтән, бу цех бәрикәтлик орунға айлинипту. Босуғисидин атлиған бойда таза әмгәк, кәсипкә дегән чәксиз муһәббәтниң һиди сезилиду. Униң үстигә ишләватқанларму асасән яшлар. Яш қизлиримизниң чевәрлик билән тикиватқан пәрдилиригә узақ вақит зоқлинип қарап турдум. Йәнә келип, бу цех пәқәт пәрдә тикиш биләнла чәкләнмәйдикән. Шундақла, херидарлириниң хаһишиға қарап, орун-көрпә, ястуқ-йотқанларни тәйярлаш қатарлиқ буйрутмиларниңму һөддисидин чиқиветипту.
– Өзиңиз көрүп турғандәк, ишчилиримизниң һәммиси дегүдәк яшлар. Биринчи новәттә, өйдә олтарған аяллар, таргетолог, дизайнер, маркетолог мутәхәссисликлири бойичә оқуватқан, амма қошумчә тапавәт тапқиси келидиған студентлар вә тикинчиликни оқуп, иш тапалмай жүргән ханим-қизлиримизни иш билән тәминләшкә тириштуқ. Айримлириниң тикинчиликтин анчә хәвири болмисиму, ишләймән дегән нийитигә қарап тәҗрибидин өткүзүп, тикинчиликниң қир-сирлирини үгинишигә ярдәм қилдуқ. Һазирчә цехимизда онға йеқин адәм ишләватиду. Келәчәктә, ишимизниң меңишиға қарап ишчилар санини йәниму көпәйтиш ойда бар. Хуш қилидиғини, ечилғинимизға анчә узақ болмисиму, херидарлардин хали әмәсмиз. Һәтта, маркетинг, дизайн саһасида оқуватқан студентлар бизниң цехқа келип тәрҗибидин өтүватиду, – деди сөһбәтдишим.
Өзи ейтқинидәк, Руқийәм Низамованиң бу цехни ишқа қошқиниға икки жилға толар-толмас вақит болди. Амма униң тиҗарәт билән шуғуллиниватқанлиғиға 5-6 жилдин ашқини ениқ. Яшлиғиға қаримай, баш болуп, алға қойған мәхсәтлиригә дадил қәдәм ташлап келивақан бүгүнки қәһриманимиз һәрқачан издиниш үстидә. Һәрхил курсларни оқуп, билимини йетилдүргәнни, йеңилиққа интилип, тәҗрибә топлиғанни яқтуриду. Заман тәливигә лайиқ тор бәтлири арқилиқму херидарларни җәлип қилишни билиду. Ишчилири билән бирликтә һәрхил видеоларни (тренд) чүширип, бүгүнки күнниң актуал мәсилилирини қозғайду. Буниң һәммиси әмгәк! Руқийәм Мимәнҗанқизи бийил Тоқума дизайнерлири билән декораторлири иттипақиға әза болди. Әмгиги мунасип баһаланип, «Атамекен» тиҗарәтчиләр палатисиниң тәшәккүрнамиси билән тәғдирләнди.
Хулләс, Руқийәм тиришчан тиҗарәтчила әмәс, йолдиши Тайирҗан билән инақ аилә қуруп, үч пәрзәндигә заманға лайиқ тәлим-тәрбийә бериватқан яш ана вә бир өйниң хизмитидин чиқиватқан үлгилик келин. Уни қайси қиридин елип язсақму, әмгиги һәқиқәтән махташқа әрзийду.
Сабирәм ӘНВӘРОВА
