Президентимиз Қасым-Жомарт Тоқаевниң новәттики Мәктүби билән тонушуп, алда бизни көплигән өзгиришләр күтүп турғанлиғиға көзүм йәтти. Йәни, Йеңи Қазақстанни йеңи мүмкинчиликләргә йол ачидиған дөләт ретидә пәрәз қилдим. Дөләт рәһбири бу қетимму тиҗарәт саһасиға алаһидә етивар берип, елимиздә кичик вә оттура тиҗарәтни тәрәққий әткүзүш ишлириниң изчил давамлишидиғанлиғини тәкитлиди.
Бүгүнки күндә кичик вә оттура тиҗарәтниң ички умумий мәһсулаттики үлүши 40 пайизға, әмгәк билән тәминләштики үлүши 50 пайизға йеқинлашти. Әлвәттә, бу – тиҗарәтчиләр үчүн яритиливатқан зор имканийәтләрниң нәтиҗиси дәр едим. Буниңдинму яхши көрсәткүчләргә йетиш үчүн алдимизда техиму көп ишлар күтүп туриду. Чүнки хәлиқниң турмуш сапасини яхшилашта –тиҗарәтчилик саһасиниң роли чоң. Йеңи кәсипорунларни ечиш арқилиқ биз йеңи иш орунлирини барлиққа кәлтүримиз. Ихтисадимизни риваҗландуруп, хәлиқниң турмуш-тирикчилигиниң яхшилишиниға тәсир қилалаймиз. Бир сөз билән ейтқанда, тиҗарәт – тәрәққиятниң томури.
Интернет бизниң һаятимизға аләмшумул өзгиришләрни елип кирди. Болупму, сүнъий әқил арқилиқ адәмниң әқли йәтмәйдиған йеңилиқлар йүз бериватиду. Тәрәққий әткән дөләтләр бу өзгиришләрни өз пайдисиға пайдиланмақта. Бизму заманға маслишип, тәрәққият көчигә илишимиз дәймизкән, сүнъий интеллект технологиясини ишқа қошушимиз һаҗәт. Шу җүмлидин, ПрезидентимизниңСтратегиялик планлаш вә ислаһатлар агентлиғиниң йенида Әқил арқилиқ рәтләш мәркизини қурушни тапшурди. Шундақла, тиҗарәтчиләрни һәддидин ташқири қаннуний чәклимиләрдин бошитиш керәклигини әскәртти.
Кәсип башлаш еғизда ейтқандәк, асан иш әмәс. Қаримаққа тиҗарәт мол тапавәт көзидәк көрүнсиму, бу көп йәрдә тәвәкәлни тәләп қилидиған кәсип. Тиҗарәтчиләр мәхсәткә йетиш йолида көплигән қийинчиларға, тосалғулуқларға дуч келиду. Бирдә пайда тапса, бирдә боһранға учрайду. Лекин бир қетимлиқ сүрүнүш – бир өмүрлүк өкүнүшниң сәвәпчиси әмәс! Чүнки утуққа йетиш көп мәшәқәтни, тинимсиз әмгәкни, жиқилип қайта турушни тәләп қилиду.
Мән 2002-жилдин етиварән тиҗарәт билән шуғуллинип келиватимән. Тиҗарәт йолини кәпшәрләш цехини ечиштин башлиған едим. Һәрхил металл буюмлирини ишләп чиқирип, наһийә хәлқи вә хошна наһийәләргә хизмәт көрситип, адил әмгәк әттим. Бу цехта жигирмигә йеқин адәм хизмәт қилиду. Буниңдин бир қанчә ай илгири пластик ящигини ишләп чиқиридиған йәнә бир йеңи цехимни ишқа қошуп, йәнә он адәмни иш билән тәминлидим. Узун жиллиқ иш-тәҗрибәмни асасқа алған һалда, шуни ишәшлик ейталаймәнки, икки миңинчи жиллар билән селиштурма түрдә алғанда, һазир кәсип башлашниң мүмкинчиликлири тола. Пәқәт җәмийәткә керәклик, келәчиги бар ишни таллиған тоғра. Бүгүнки күндә атиғи аләмгә тариған чоң-чоң завод-фабрикила, брендларниң иши өз вақтида кичик тиҗарәт орунлиридин башланған. Демәкчи болғиним, дөләт рәһбириниң кичик вә оттура тиҗарәтни тәрәққий әткүзүшкә алаһидә әһмийәт бериши бекар әмәс.
Алимҗан ҺАШИМОВ,
Уйғур наһийәлик мәслиһәтниң депутатти,
тиҗарәтчи
