Һәммигә бәлгүлүк «Таза Қазақстан» акцияси башланғандин бу ян, елимизниң мәдәний тәрәққиятида тилға аларлиқ ишлар әмәлгә ашурулуп кәлмәктә. Хусусән, мәһәллиләрниң аватлишишиға, коча вә ериқ-туғанларниң таза болушиға һәр бир жутниң аһалиси аңлиқ сәвийәси билән қатнишип, иш-чариләрни уюштурмақта. Жүмлидин, өткән һәптиниң йәкшәнбә күни Чонжа йезисиниң Ж.Әлахунов, Һ.Арзиев вә Назугум кочилириниң турғунлири мәзкүр кочиларниң мирави (көк беши) Алимжан Мәхсутовниң Дуния йүзилик қоршиған муһитни һимайә қилиш вә мусулман әһлиниң Қурван һейт мәрикә күнигә бағлиқ уюштурған бу тәшәббусиға мувапиқ коча турғунлири гүжәк-кәтмәнлирини елип, ериқ-туғанларни тазилаш вә рәткә кәлтүрүш ишлирини әмәлгә ашурди. Бу шәнбиликкә коча турғунлириниң оттуздин ошуқ адими қатнишип, ериқлардики толуп кәткән әхләтләрни, әтрапида өскән явайи чөпләрни, ташланған пластик қачиларни вә башқиму турмушқа һажәтсиз һесапланған нәрсиләрни тазартип чиқти. Қатнашқучилар аталған кочиларниң бир километр арилиғидики паскиничилиқни (әхләтни) чиқарди. Бу, әлвәттә, «Таза Қазақстан» акциясиниң жил бойи давам етиватқанлиғиниң нишани.
Тазилаш ишлири мәркизий базарниң күн чиқиш тәрипидики чиқиватқан булақ сүйиниң көзини ечиш, ериққа толуп кәткән (базар хизмәтчилириниң, хадимлириниң жавапкәрсизлик, қанунсиз ясалған яки ташлиған түрлүк пластик қачилар билән ярамсиз болуп қалған нәрсилирини, кесилгән шах-шәмбиләрни) толуқ тазилап, суниң әркин еқишиға, кочиларға чиқип кәтмәслигигә, шундақла суни исрапсиз пайдилинишқа толуқ мүмкинчилик ясиди. Әлвәттә, бу иш-чарә экологиялик муһитни рәткә кәлтүрүшниң бир амилидур.
Коча адәмлириниң тазилап, жиғип қойған әхләтлирини һажәтлик орунларға йәткүзидиған орунларниң иши қалди, халас. Мошу йәрдә шуни алаһидә ейтишқа тоғра келидуки, мундақ ишларни һәр жили үч-төрт рәт уюштуримиз. Лекин бу «тәртипсизлик» жилда қайтилинип туриду. Шундақ жавапкәрсизлик тонутиватқан, мәдәнийәтсизлик көрситип һәр жайға әхләтлирини ташлаватқан инсанлар үчүн бәлгүлүк «әхләт төкүш» (базар йениди) орнини қурса яки беқинмай әтрапни паскиничилиққа патуриватқан адәмләргә жәриманә салса, мүмкин бу ишлар рәткә келәр еди. Мүмкин болса ундақ орунларға камериларни орнитип, ениқлашқиму болар еди. Буниңдин кейин бу ишларға жавапкәр органлар, мәһкимиләр вә йеза һакими аппарати қолға алар дегән үмүтимиз бар. Шундақ қилғандила, мундақ парасәтсизлик билән қилған ишниң алдини алған болар едуқ.
Күн санап мәдәнийәттин тәрәққият тепиватқан хәлиқ һәр қачан мәдәнийәтлик яшап, аңлиқ йосунда заман тәрәққиятиға һәссә қошуп келишимиз келәчәк әвлатлар үчүнму зор тәрбийидур.
Худавәди МӘҢСҮРОВ
