Қазақстанниң Хәлиқ язғучиси, драматург, «Құрмет» ордениниң саһиби Әхмәтҗан ҺаширийУйғур наһийәсиниң Ават йезисида болуп, Һ.Искәндәров намидики оттура мәктәпниң оқуғучилири билән учрашти.
Қазақстанниң хизмәт көрсәткән әрбаби, Қазақстан Президенти стипендиати, хәлиқара «Алаш», «Қорқыт Ата» вә уйғур меценатлири тәсис қилған «Илһам» мукапатлириниң лауреати, Әмгәкчиқазақ наһийәсиниң һәм Алмута вилайитиниң Пәхрий граждини аталған бүйүк әдипниң Аваттики билим дәргаһиға қәдәм ташлиши, оқуғучиларни толиму тәсирләндүрди. Әхмәтҗан Һаширийға беғишланған әдәбий кәч «Қәләмдин туғулған нур» дәп аталди. Ричсәтчиләрниң сөзидин кейин, акт залидики йоғанкөк экрандин әдипниң өмүр йоли тоғрилиқ чүширилгән видеоролик көрситилди. Учришиш давамида оқуғучилар сөйүмлүк язғучисиға өзлирини толғандурған соаллирини йоллиса, әдип биридин бири өткән талантлиқ, тетик балиларниң соаллириға җавап бәргәч, мәхсус тәйярланған әдәбий вә музыкилиқ номерлардин бәһирләнди.
Һ.Искәндәров намидики оттура мәктәп мәмурийитиниң Әхмәтҗан Һаширийни мәктәпкә мәхсус чақиртиш билән тәклип қилиши бекар әмәскән. Мәзкүр билим дәргаһида үчинчи чарәктин тартип уюштурулған «Үч китап» лайиһәси асасида устазлар вә оқуғучилар язғучиниң китаплирини таллап елип, оқуп чиқипту. Учришиш давамида әйнә шу китапларниң қисқичә мәзмуни чүшәндүрүлди. Атақлиқ Хәлиқ язғучисиниң қәлимигә мәнсуп роман, повестьлардин елинған сәһнилик көрүнүшләр көрситилди. Болупму, 7-синип билим алғучилири сәһниләштүргән «Солмас гүл» әсәридин елинған парчә арқилиқ, оқуғучиларниң бу учришишқа узақтин бери тәйярланғанлиғини бирдин байқалди. Дәрвәқә, атақлиқ язғучиму шаир жутиға алаһидә тәйярлиқ билән кәпту. У хәлиққә, ата-аниларға дәп йезип кәлгән мураҗиитини мәктәп мудири Суджата Имиршаеваға тапшуруп бәрди.
– …Мән улуқ язғучи Мухтар Әвезовниң шагиртимән. Униң: «Сән әсәрни уйғур тилида, ана сүти билән кәлгән уйғур тилида яз!» дегән һекимәтлик сөзи маңа илһам вә мәдәт бәрди. Мошу күнгичә уйғурчә, уйғур тилида йеңи-йеңи әсәрләрни йезип келиватимән, – дәп башлиған сөзини муәллип.Язғучи асасән, ана тилимизниң қәдир-қиммитигә тохтилип, ата-аниларни балилирини өз ана тилида оқутушқа чақирған.
Учришишниң иккинчи бөлүмидә риясәтчиләр һөрмәтлик меһманни сәһнә төридики орунға тәклип қилди. Сөз тизгинини қолға алған әдип һаят йоли, балилиғи, иҗадийити һәққидә сөзләп бәрди. Чоң-кичик оқурмәнлиридин язғучиға «Китап йезиш процесси сиз үчүн қандақ өтиду? Йезишқа қандақ илһам алисиз?», «Сиз әсәрлириңизни қандақ оқурмәнләргә беғишлидиңиз? Китаплириңизниң асасий ойи немидә?», «Язғучи ретидә әң қийин вақитлириңиз қандақ болди? Қандақ йәңдиңиз?», «Һазирқи вақитта әсәрлириңиз қандақ мавзуда йезиливатиду?» дегәнгә охшаш һәрхил соаллар келип чүшти.
Кейинновәт сөз сөзлигүчиләргә берилди. Шу җүмлидин, наһийә мәркизидин кәлгән меһман, җумһурийәтлик «Или вадиси – Іле өңірі» гезитиниң баш муһәррири Абдуманап Аблизов мәзкүр әдәбий кәчниң әһмийити жуқури чарә-тәдбир екәнлигини ейтип, Ә.Һаширийға беғишлап йезип кәлгән шеирини оқуп бәрди. Мәктәп мудири мошундақ учришишларниң арисини үзмәй, бу башланмини давамлаштурушқа нийәтлик екәнлигини йәткүзди. Шуниң билән қатар, һөрмәтлик меһманға һөрмәт билән чапан кийгүзди.
Сабирәм ӘНВӘРОВА
