Егеменді мемлекеттің кез келген тұрғыны ең алдымен Тәуелсіздік деген қасиетті сөзді қадір тұтуы керек. Сол тәуелсіздікті қорғап, сақтау үшін әр азамат еңбегін адал атқаруы тиіс. Елім маған не береді емес, мен еліме не берем деген қағидатты басшылыққа алғанда ғана еркін еліміздің болашағы нұрлы болмақ. Сыбайластық деген жүрекке түрпідей тиетін сөзден, жемқорлық деген жаман аттан бойымызды аулақ ұстағанда ғана мемлекетіміз бүгінгіден де бақуатты болары сөзсіз.
Сыбайлас жемқорлық санатындағы қылмыстарға негізінен лауазымды қылмыстар жатады. Яғни, қызмет өкілеттігін теріс пайдалану, билікті не қызметтік өкілеттікті асыра пайдалану, пара алу, пара беру, парақорлыққа делдал болу, қызметтік жалғандық жасау, жалған сөз жеткізу, сеніп тапсырылған бөтен мүлікті иеленіп алу немесе ысырап ету, жалған жауап беру, сарапшының жалған қорытындысы немесе қате аудару, жалған жауап беруге немесе жауап беруден жалтаруға, жалған қорытынды беруге немесе қате аударуға сатып алу сынды қылмыстар сыбайластық байланыстарды пайдалану арқылы жасалады. Біз қазынашылық басқармасында бюджеттің қаржысының мақсатты жұмсалуын қадағалаймыз, діттеген жеріне еш кідіріссіз жетуін бақылауға аламыз. Қолма-қол ақшамен жұмыс істемесек те қомақты қаржының дұрыс жұмсалуына міндеттіміз. Қазір бізде барлық операциялар электронды түрде жүзеге асырылады. Күнделікті жұмысымызда басшымыз сыбайластыққа жол бермеуге, бұрыс әрекеттерге бармауға, таныс-тамырдың құжаттарын тексерусіз өткізе салайық, деген ойдан аулақ болуға шақырады.
Қазақстан тәуелсіздік алған алғашқы жылдардан бастап сыбайлас жемқорлықпен күрес саясатын нақтылап, бүгінде әлемдік қауымдастықтың белсенді мүшесіне айналған. Сыбайлас жемқорлықтың көріністерін жою мақсатында заңнамалық актілер қабылданып, шаралар атқарылуда. Оның айқын дәлелі, 2015 жылдың 18 қарашасында Қазақстан Республикасының «Сыбайлас жемқорлыққа қарсы іс-қимыл туралы» Заңы қабылданды. Бұл заңның мақсаты — азаматтардың құқықтары мен бостандықтарын қорғау, сыбайлас жемқорлық көріністерінен туындайтын қауіп-қатерден ұлттық қауіпсіздікті қамтамасыз ету, жемқорлыққа байланысты құқық бұзушылықтың алдын алу, олардың жолын кесу және ашу. Сонымен қатар, тағы бір серпін ретінде Қазақстан Республикасының сыбайлас жемқорлыққа қарсы саясатының 2022 -2026 жылдарға арналған тұжырымдамасын атап өтуге де болады. Бұл еліміздегі құқық қорғау органдарының қызметін жетілдіруге бағытталған, жемқорлыққа қарсы әрекеттермен пайда болуының алдын-алуда жүйелі, тұрақты шаралар атқаруды қамтамасыз етеді.
Президенттің жыл сайынғы халыққа жолдаған Жолдауында сыбайлас жемқорлықпен күрес назардан тыс қалған емес. Мемлекет басшысының сыбайлас жемқорлыққа қарсы іс-қимыл және қаржы мониторингі органдарымен бірлесіп, мемлекет пен квазимемлекеттік сектордың сатып алуларын реттеу тәсілдерін, соның ішіндегі осы саладағы мемлекеттік бақылау жүйесін түбегейлі өзгерту тапсырылған болатын. Бұл осы орайда мемлекеттің осы жағымсыз құбылысты жою бағытындағы кешенді және жүйелі күрес жүргізу саясатының жалғасын тауып жатқанын пайымдайды.
Мемлекетіміздің әрбір азаматы Қазақстан Республикасының Конституциясын және заңдарын сақтауға, басқа адамдардың құқықтары мен бостандықтарын, абыройы мен қадір-қасиетін құрметтеуге міндетті. Әр тұлға адамгершілік, зияткерлік, мәдени тұрғысынан дами отыра, бойына сыбайлас жемқорлықты қабылдамаудағы белсенді азаматтық ұстаным қалыптастыра білсе сыбайлас жемқорлықтың жолын кесуге болады.
Гульфизям ЗАИРОВА,
аудандық қазынашылық басқармасының бас маман-бас қазынашысы
